שמואל א 18:1 (HEB)
ויהי ככלתו לדבר אל שאול ונפש יהונתן נקשרה בנפש דוד ויאהבו יהונתן כנפשו׃

שמואל א 18:2 (HEB)
ויקחהו שאול ביום ההוא ולא נתנו לשוב בית אביו׃

שמואל א 18:3 (HEB)
ויכרת יהונתן ודוד ברית באהבתו אתו כנפשו׃

שמואל א 18:4 (HEB)
ויתפשט יהונתן את המעיל אשר עליו ויתנהו לדוד ומדיו ועד חרבו ועד קשתו ועד חגרו׃

שמואל א 18:5 (HEB)
ויצא דוד בכל אשר ישלחנו שאול ישכיל וישמהו שאול על אנשי המלחמה וייטב בעיני כל העם וגם בעיני עבדי שאול׃

שמואל א 18:6 (HEB)
ויהי בבואם בשוב דוד מהכות את הפלשתי ותצאנה הנשים מכל ערי ישראל לשור והמחלות לקראת שאול המלך בתפים בשמחה ובשלשים׃

שמואל א 18:7 (HEB)
ותענינה הנשים המשחקות ותאמרן הכה שאול באלפו ודוד ברבבתיו׃

שמואל א 18:8 (HEB)
ויחר לשאול מאד וירע בעיניו הדבר הזה ויאמר נתנו לדוד רבבות ולי נתנו האלפים ועוד לו אך המלוכה׃

שמואל א 18:9 (HEB)
ויהי שאול עון את דוד מהיום ההוא והלאה׃

שמואל א 18:10 (HEB)
ויהי ממחרת ותצלח רוח אלהים רעה אל שאול ויתנבא בתוך הבית ודוד מנגן בידו כיום ביום והחנית ביד שאול׃

שמואל א 18:11 (HEB)
ויטל שאול את החנית ויאמר אכה בדוד ובקיר ויסב דוד מפניו פעמים׃

שמואל א 18:12 (HEB)
וירא שאול מלפני דוד כי היה יהוה עמו ומעם שאול סר׃

שמואל א 18:13 (HEB)
ויסרהו שאול מעמו וישמהו לו שר אלף ויצא ויבא לפני העם׃

שמואל א 18:14 (HEB)
ויהי דוד לכל דרכו משכיל ויהוה עמו׃

שמואל א 18:15 (HEB)
וירא שאול אשר הוא משכיל מאד ויגר מפניו׃

שמואל א 18:16 (HEB)
וכל ישראל ויהודה אהב את דוד כי הוא יוצא ובא לפניהם׃

שמואל א 18:17 (HEB)
ויאמר שאול אל דוד הנה בתי הגדולה מרב אתה אתן לך לאשה אך היה לי לבן חיל והלחם מלחמות יהוה ושאול אמר אל תהי ידי בו ותהי בו יד פלשתים׃

שמואל א 18:18 (HEB)
ויאמר דוד אל שאול מי אנכי ומי חיי משפחת אבי בישראל כי אהיה חתן למלך׃

שמואל א 18:19 (HEB)
ויהי בעת תת את מרב בת שאול לדוד והיא נתנה לעדריאל המחלתי לאשה׃

שמואל א 18:20 (HEB)
ותאהב מיכל בת שאול את דוד ויגדו לשאול וישר הדבר בעיניו׃

שמואל א 18:21 (HEB)
ויאמר שאול אתננה לו ותהי לו למוקש ותהי בו יד פלשתים ויאמר שאול אל דוד בשתים תתחתן בי היום׃

שמואל א 18:22 (HEB)
ויצו שאול את עבדו דברו אל דוד בלט לאמר הנה חפץ בך המלך וכל עבדיו אהבוך ועתה התחתן במלך׃

שמואל א 18:23 (HEB)
וידברו עבדי שאול באזני דוד את הדברים האלה ויאמר דוד הנקלה בעיניכם התחתן במלך ואנכי איש רש ונקלה׃

שמואל א 18:24 (HEB)
ויגדו עבדי שאול לו לאמר כדברים האלה דבר דוד׃

שמואל א 18:25 (HEB)
ויאמר שאול כה תאמרו לדוד אין חפץ למלך במהר כי במאה ערלות פלשתים להנקם באיבי המלך ושאול חשב להפיל את דוד ביד פלשתים׃

שמואל א 18:26 (HEB)
ויגדו עבדיו לדוד את הדברים האלה וישר הדבר בעיני דוד להתחתן במלך ולא מלאו הימים׃

שמואל א 18:27 (HEB)
ויקם דוד וילך הוא ואנשיו ויך בפלשתים מאתים איש ויבא דוד את ערלתיהם וימלאום למלך להתחתן במלך ויתן לו שאול את מיכל בתו לאשה׃

שמואל א 18:28 (HEB)
וירא שאול וידע כי יהוה עם דוד ומיכל בת שאול אהבתהו׃

שמואל א 18:29 (HEB)
ויאסף שאול לרא מפני דוד עוד ויהי שאול איב את דוד כל הימים׃

שמואל א 18:30 (HEB)
ויצאו שרי פלשתים ויהי מדי צאתם שכל דוד מכל עבדי שאול וייקר שמו מאד׃
Previous Chapter
« שמואל א 17
Next Chapter
שמואל א 19 »

שמואל א (HEB) Chapter Selection

HEB Book Selection List

View full list of HEB Bible Books and Chapters